實戰投資
想像同人打交，但你懶得操體能、唔學招式、唔拉筋；臨場仲要唔熱身、闔埋雙眼、任由旁邊專家叫你出左拳踢右腿，你就照跟無疑。咁都唔死得，係家山有福！可怕的是，好多人投資時，正正就係唔學、唔練、唔睇、唔理，只聽財演講number照跟。輸錢仲要學唔到嘢，太不值了吧！
每個人的經歷、性格、膽色、財務狀況、金融知識各有不同，無可能有一項投資能夠適合任何人（並非指消防處那位）。錢幾辛苦搵返來，就要幾認真投出去，絕不能假手於人。認真唔一定贏錢，但一定贏到經驗。
坊間有很多有關投資致富的書籍，不敢胡亂批評，只希望讀者要明白這類書籍的作用是讓你振奮，充滿希望地去投資。希望年輕人不要怕煩、怕悶、怕深，要讀嚴謹一點講財務分析、風險管理和金融歷史嘅書。
投資和打交一樣，必需透過不停鍛鍊和實戰才會成功。投資是一場「鬥一生」的戰役，最重要就是鍛鍊「健康的投資態度」，戒掉以下惡習：
• 贏就興奮、輸就無癮：市旺時，身邊朋友愛「講股」，跟風入市，起初贏錢就覺得自己好掂！但之後個市開始回，輸錢就無癮，將股票收埋不理，直至下次市旺又重複犯錯！
• 未賣當未輸：很多人不願賣出虧本的投資，覺得未賣就未算輸。反而贏錢嘅投資就想賣掉，覺得咁先算落袋。這惡習容易導致贏粒糖輸間廠！
• 把朋友當專家：身邊總有些朋友喜歡作大，買中隻股票就周圍晒命，買錯就當無發生過。跟他買，後來輸錢仲要畀人怨「搭沉船」！
• 貪小便宜：如果因為超市禮券而亂買投資產品，除了輸錢還會輸面。不要以為自己一定不會犯這錯誤 — 我到現在仍然有這毛病！其實不是真的貪那一千幾百，而是因為投資往往心大心細，禮券和回贈能推你一把，但這是完全不理性的行為。
• 投資當買衫：很多人投資心態像買衫，喜歡等股票跌幾個價位才覺得抵買；股價唔跌就好似店主唔肯減價咁，點都唔肯買。
• 被動式投資：sales游說買掛鈎產品時，說可收多一點利息，萬一要接貨也可用低價買貨，內地更誇張到叫「打折股票」。買掛鈎產品是沽出期權，收取期權金，代價是贏無你份，輸就你找數！可能真係有人唔明，但其實很多人只是扮唔明，因為過不了「未賣當未輸」、「貪小便宜」和「投資當買衫」這些心魔。
我的思維比較怪：除了經濟增長，投資是零和遊戲，全世界不同人在對弈，把不同的風險轉來轉去。贏的方法就是了解風險哪裡走、如何轉，盡力走位，保持「唔中招」，才有機會分享到輸家的財富！這絕對知易行難，只能透過實戰訓練。
上週提到要努力尋找工作的至愛。但朋友說投資並非他所愛，我解釋：投資唔同，你嘅錢就等於你嘅仔女（所以你仔女覺得啲錢係佢哋嘅），無得揀，鍾唔鍾意都要好好照顧。
現實非常殘酷，有人贏就有人輸，只能希望自己多點機會站在贏方，想次次贏嘅人多數輸鑊金！
鄭發
歡迎轉載，請註明出自 #貼地風管
Search